سیزیرین آپریشن کے بعد چالیس دن سے زیادہ نفاس کا خون آنے کی صورت میں نماز پڑھنے کا کیا حکم ہے؟
ـــــــــــــــــــــــــــــــــــــــــــــــــــــــ
السلام علیکم ورحمۃاللہ وبرکاتہ
میرا سوال آپسے یہ ہے کہ سی سیکشن آپریشن کے بعد جو نفاس کا خون آتا ہے وہ کبھی کبھی شروعاتی دنوں میں نہیں آتا اور چالیس دن سے زیادہ نکل جاتا ہے مطلب پچاس پچپن دن تو کیا اس حالت میں نماز پڑھے گے جبکہ خون اس قدر آئے کہ نفاس والی کو خود کو سنبھالنا مشکل ہو جائے اور اگر نماز پڑھے گی تو کس طرح پلیز رہنمائی فرمایئے السائلہ : سدرہ ھارون
از بریلی شریف یوپی انڈیا
وعلیکم السلام ورحمۃ اللہ وبرکاتہ
الجواب بعون الملک الوہاب :
بچہ پیدا ہونے کے بعد جو خون آتا ہے اسے نفاس کہتے ہیں۔ شریعت میں نفاس کی زیادہ سے زیادہ مدت چالیس دن ہے۔ اگر کسی عورت کو چالیس دن سے زیادہ خون آتا رہے تو چالیس دن کے بعد آنے والا خون نفاس نہیں ہوگا، بلکہ اس کی تفصیل عورت کی سابقہ عادت اور حالات کے مطابق ہوگی۔
اگر ولادت کے بعد خون بالکل نہ آئے تب بھی صحیح قول کے مطابق عورت پر غسل واجب ہے اور اس پر نماز و روزہ لازم ہیں۔
اگر نفاس کا خون چالیس دن سے پہلے بند ہو جائے تو خون بند ہوتے ہی غسل کرکے نماز اور روزہ شروع کرنا لازم ہے۔ اور اگر چالیس دن پورے ہونے کے باوجود خون جاری رہے تو چالیس دن مکمل ہوتے ہی غسل کرکے نماز اور روزہ شروع کرے۔
لہٰذا صورت مسئولہ میں اگر عورت کو سیزیرین آپریشن کے بعد پچاس یا پچپن دن تک خون آتا رہے تو چالیس دن گزرنے کے بعد نماز چھوڑنا جائز نہیں، بلکہ چالیس دن مکمل ہوتے ہی غسل کرکے نماز شروع کرے۔ البتہ چالیس دن کے بعد آنے والے خون کے حیض یا استحاضہ ہونے کا حکم عورت کی سابقہ عادت اور دیگر تفصیلات کے مطابق متعین ہوگا۔
اگر خون اتنا زیادہ ہو کہ عورت کے لیے خود کو سنبھالنا مشکل ہو تو شرعی احکام کے مطابق اپنی استطاعت کے مطابق نماز ادا کرے۔ اگر کھڑے ہوکر نماز پڑھنے کی طاقت نہ ہو تو بیٹھ کر پڑھے، اور اگر بیٹھ کر بھی نہ پڑھ سکے تو لیٹ کر اشارے سے نماز ادا کرے۔ خون کی کثرت کی وجہ سے نماز ترک نہ کرے۔ ساتھ ہی اگر خون غیر معمولی طور پر زیادہ آرہا ہو تو طبی معائنہ بھی ضرور کرائے۔
واللہ تعالیٰ اعلم بالصواب
کتبہ : سرفراز احمد قادری امجدی
1 جمادی الاولی 1448ھ 14 اکتوبر 2026ء
بانی و صدر محبوب الاولیاء فاؤنڈیشن لہوریا شریف ضلع سیتامڑھی بہار خطیب و امام، سنی حنفی بریلوی جامع مسجد پرسواڑا، ضلع بالاگھاٹ، ایم پی
Tags
حیض و نفاس کا بیان